14
апрель
2023
Талапкерлерге ашылған «Ашық есік күні»
Талапкерлерге ашылған «Ашық есік күні»
Бүгінгі күні мектеп бітіруші түлектерді ерекше толғандырып отырған басты мәселе – мамандық таңдау. Олардың алдында сан тарау жол жатыр, алуан түрлі мамандық күтіп тұр. Әр жүректе бір арман. Ол – қоғамға қажетті мамандық таңдап, қалаған мамандығының иесі болу. Осы орайда Сарқан гуманитарлық колледжі мектеп оқушыларына кәсіби бағдар беру мақсатында оқу орнында 14 сәуір күні ашық есік күні өткізді. Ашық есік күніне аудандық мектеп оқушылары шақырылды.
Бұл іс-шараның мақсаты – талапкерлерге аса маңызды таңдау жасауға болашақ мамандығын таңдауға көмектесу. Орта арнаулы кәсіптік білімге қашан да сұраныс жоғары.Тек қажеттілігін, оның тиімділігін түсіндіре білген жөн. Кездесу барысында жоспарланған көптеген шаралар өтті. Колледж оқытушылары келген оқушыларды тіркеп, оқу кабинеттеріне шығарып салып отырды. Колледж бойынша саяхат жасалды.
Колледж дәліздері мен оқу кабинеттері мерекеге сай безендірілген.Экскурсия кезінде мектеп оқушылары колледждің тарихымен, материалдық базасымен танысты, классикалық анатомия кабинеті, жұмсақ материалдармен жұмыс жасайтын кабинет, мұражай, композиция кабинеті, көрме залын аралады. Ашық есік күнінде оқушылар колледждің оқу ісімен танысып қана қоймай, сондай-ақ қызықты, көптеген үйірмелердің жұмысын көрді.